《武阿哥七分钟小串》MP3舞曲下载

广场舞舞曲歌词：

这是一首长篇叙事嘻哈，关于一个走失小孩的遭遇，改编自诗人王小龙的小说集《凭什么》（文汇出版社2018）
全题：魔都长谣/一只飘在苏州河两旁边的谣言
嗰趟我想讲只王小龙讲个故事。
是伊一只梦，大概老早做个，
所以伊偷懒故事直接就叫“旧梦”。
?全晓得王小龙伐？
王小龙是作家、纪录片人，
当然最重要个是诗人。
现在还在写诗或者关心诗个中年人全晓得，
王小龙影响过不少人。
所以伊还应该叫诗歌方面的文化活动家，
至少在我印象是嗰恁个。
我搭伊阿弟是大学同学。
不过我从来呒没想过
阿哥辈分个王小龙平常做眼啥个梦。
2018年伊新出了本书，
里向就写到了嗰只《旧梦》。
梦里向做到一个七八岁个小鬼是第一趟吃肉，
乃末一个老头吃肉吃煞脱了，
辰光是1962年。
我就是62年养个。
当时阿拉爷肺结核住在医院里，
阿拉娘是临时工，
伊讲伊是一个**靠两块乳腐撑下来个。
我有眼扯出去了…乃末
我真个好奇小龙阿哥做啥会做嗰恁介个梦。
一只梦开始个辰光是1959年伐，
一只小鬼头末大概是5岁左右伐。
早上向伊拉娘上班，伊迓迓较跟出来。
盯牢著伊拉娘个**走著好几条马路，
等过脱一座苏州河桥之后，
发觉只**不是自家姆妈嘛，
回过头来再寻末，哪恁连桥也没了嘛。
从此伊没见脱回转去个路，
从此伊不相信随便啥人**。
一
苏州河旁边个纱厂，走出来只老头，
人家叫伊苏北爹爹，就是爷爷啦，
拿小鬼领进门房间里向。
苏北爹爹本来养只狗前两天没见脱了，
估计末总归是拨捉脱了吃脱了。
反正59年个热天介没贼骨头，也没狗。
假使今朝上早班，苏北爹爹就拿小鬼
关在暗黜黜个宿舍里门锁起来。
小鬼拿头嵌在窗门铁栅栏当中，
看后弄堂里晾个衣裳荡来荡去，
还有纱厂出气口里吹出来白颜色个棉花絮。
伊会得爹爹、奶奶、阿爸、妈妈
瞎叫窗口头走过个每个人，
有种会得拨伊叫停下来看牢伊，
过著两天小鬼也会?一声算叹口气。
等到苏北爹爹做夜班末
就好带伊去厂看阿姨妈妈。
纱厂里机器像造造反反苍蝇关在盒子里
唦啦唦啦嗡啊嗡啊，
阿姨妈妈讲言话也像吵相骂哇哩哇啦，
外加手全毛毛剌剌。
小鬼在门房间铺板上白相，
妈妈过来弹记鸡鸡，阿姨过来打记头塔，
第二天醒转来总在了苏北爹爹背上向。
两家头沿牢苏州河趤记趤记回宿舍去，
只要经过一座桥，
小鬼就觉着嗰座好像可以通到自家屋里。
不过伊一声也不敢响，
想跳下来就跑呒没胆量，
只好假装又睏着，
在了苏北爹爹热烘烘个背上摇摇晃晃。
桥，搭著桥下头个河浜，
一摇 一摇，一晃一晃。
天上个早上向个太阳，
一摇一摇，一摇一晃。
梦，做法做法，阿拉晓得个，
常桩会做成噩梦个。
二
嗰日天隔壁头个小把戏在弄堂口喂饭，
小鬼头盯牢人家碗里半口肉看了许。
苏北爹爹出去，兜了半日天，
也拎著一条肉转来。
下半天开始房间里全是肉个香，
香得来暗黜黜个宿舍好像铮铮亮。
62年个冷天介，吃好著肉，
一老一小睏在床上不动不响。
半夜里小鬼头肚皮痛痛醒，
听旁边苏北爹爹放了只响屁。
半夜里小鬼头第三趟拨肚皮痛醒，
推推旁边苏北爹爹硬绷绷呒没热气。
小鬼头起来摸鞋子，
大个帮爹爹穿，小个伊自家穿，
不晓得何里看来个，磕只头，
借著月亮光，自说自话摸出宿舍。
一歇歇梦里向又到了大热天，
小鬼学会了拾垃圾，
卖脱著末要交拨老大一半铜钿。
12岁个老大迓在桥洞下头吃半只偷来个西瓜，
拿还有眼红些些个西瓜皮分拨一帮小兄弟。
夜饭末伊拉拥到点心店去分一碗阳春面，
倒酱油倒米醋胡椒粉
搞得来服务员阿姨厥过去。
回到桥下头又瞎叫瞎唱像纱厂里个女人，
一直吵到头班车在了桥上开过
乃末睏觉太平。
天还墨墨暗，
睏势懵懂个老大起来出水
从伊席子旁边走过，
小鬼摸摸面孔上前两天拨伊打出来个疤，
迓迓较跟在后头盯牢伊**，
一脚拿伊蹬进一脚拿伊蹬进
一脚拿伊蹬进苏州河。
桥，搭著桥下头个河浜，
一摇一摇，一晃一晃。
天上个早上向个太阳，
一摇一摇，一摇一晃。
只梦做脱一半了。
我歇口气哦。
阿拉耐心点听下去，
王小龙嗰只梦后头还有啥温馨眼个物事伐。
三
对苏州河一路上小鬼头已经熟透，
不过介许多桥，伊越来越吃不准
自家屋里向要从何里座桥走。
现在伊开始卖棒冰，
故咾背只白颜色木头箱子，
看到一个穿马路个小姑娘
着条绿颜色个裙子。
小姑娘哇叫一声
拨脚踏车挭在地上脚馒头掼破，
小鬼奔过去拉伊，
拿棒冰箱子拨伊坐。
陪伊到小学门口，
同学全拿小姑娘只脚馒头拥牢。
小鬼头想想自家只有棒冰咾，
伊就箱子开开来挺伊拉拿。
又哇一声冲出来个女老师，
***全吓得来
拿已经滴滴溚溚个棒冰厾回箱子。
乃大门再关脱嘭一响，
王小龙书里向写
“阳光灿烂全关在校门里向”。
一直到中上向再看到校门开开来，
再看到小朋友拥出来，
再看到绿裙子小姑娘飞出来，
呒没人看到小鬼头马路对过立了许。
伊拿五十根棒冰
统统剥开嚼碎吞脱咽脱，
从此不讲言话就像哑子哑脱。
后首来就开始传了，
有个小鬼头夜到睏冷库，
日里在苏州河伊面趤法趤法，
跑上去问伊买根棒冰
侬钞票还没拿出来就已经觉着冷煞。
蛇，侬晓得伐啦？最欢喜瀴个呀，
就在伊血管里迓了，
所以侬千万当心覅拨伊手碰着。
只谣言就嗰恁
在苏州河两旁边传著老长一?，
一直到有人又开始添油加酱，
讲不晓得何里日中上向，
讲其实交关人全看到，叫伊拉不响，
讲苏州河上漂著一只
白颜色个
棒冰箱
子。
桥，搭著桥下头个河浜，
一摇一摇，一晃一晃。
天上个早上向个太阳，
一摇一摇，一摇一晃。
?全看到过涨潮伐？
长江个水灌进黄浦江，
黄浦江个水灌进苏州河，
黄哈哈浑沌沌，
还有现在已经看不见个墨墨黑。
四
小鬼头涨潮个辰光
从新闸路桥铁架子顶上向跳下去水里向一汆，
头再露出来伊已经15岁。
纱厂门口一眼落著夜班个阿姨妈妈
还在吵吵讲讲，
苏北爹爹立了门房间门口头
也像伊拉一样套只红袖章。
拾垃圾个***奔来奔去最忙，
有眼红些些个两块西瓜皮
还在桥洞个地上。
苏州河上个介许多桥伊还是认不清爽，
再讲再讲，
人在了城市里没见脱最戆，
伊晓得伊要去个是太阳落下去个地方。
只小鬼头就嗰恁，走法走法，
走出了王小龙个梦。
故事结束个辰光，“远方远方，”王小龙讲，
“就是很远很远个地方，”伊讲。
伊嗰是伊写了最好个一只句子伊讲，
“一句废话，”伊讲。
桥，搭著桥下头个河浜，
一摇一摇，一晃一晃。
天上个早上向个太阳，
一摇一摇，一摇一晃。
未经许可,不得翻唱或使用